Бер табадан – ике сайт

Ксения Владимирова сүз­ләренә караганда, www.dostizhenia.ru республикада яшәүчеләр һәм Татарстан кунаклары өчен эшләнгән. Кирәкле мәгълү­матны эзләп табуы җи­ңелрәк булсын өчен сайтта төрле бүлекләр бар. “Акыллы Татарстан”, “Икмәк­ле Татарстан”, “Сә­ләтле Татарстан”, “Спорт сөюче Татарстан” кебек рубрикалар ярдәмендә һәр­кем респуб­лика уңышлары турында укый алачак”, – диде Ксения Владимирова. Сайттан файдаланучылар күп булсын өчен биредә бәйге дә игълан иткәннәр. Бүгеннән баш­лап һәркем үзенең уңыш­лары турында бөтен дөньяга җит­керә ала. Мо­ның өчен, сайтка кереп, оештыручыларга хат кына юлларга кирәк. Нәти­җәләр­не һәр атна-ун көн саен игълан итәчәкләр. Иң-иңнәргә бүләкләр дә бар. Бәйгедә катнашучыларны бу атнада Казанда башланачак Су спорты төрләре буенча дөнья чемпионатына билетлар, хәтта 10 литр бензин белән дә кызыксындырмакчылар.

Сайтларның икенчесе үзенә күрә бер социаль челтәргә әйләнеп китәргә мөмкин дип фаразлый уйлап табучылар. “Президент бе­лән бергә” хәрәкәте вә­киле, Татарстанның ихтыярилыкны үстерү үзәге директоры Анна Синеглазова әйтүенчә, www.vmeste.tatar – аралашу, яңа дуслар табу өчен яхшы урын. Сайтның өстенлеге – биредә ел дә­вамында рес­пуб­ликада булачак мәдә­ни, күңел ачу һәм башка чаралар турында мәгълүмат туп­лап барырга җыеналар. Теге яки бу бәй­рәмдә катнашырга те­ләү­че­ләр алдан ук тиешле исем­лектә теркәлә дә ала. “Чараларны һәркем тәкъ­дим итә ала, – ди Анна Синеглазова. – Бәйрәмнәр исемлеген гел яңартып торачакбыз”. Әлегә ике сайт та рус телендә генә. Хәзер татар телендә дә шундый ук эч­тәлектәге сайтлар булдыру юнәлешендә эш­лиләр икән. Булганын гына тәр­җемә итәргәме, әллә яңасын уйлап табуы отышлыракмы – бу мәсьәләне хәл ит­мәгәннәр әле.

“Ватаным Татарстан”