Баулы хуҗалыкларында техниканың язгы-кыр эшләренә әзерлеген тикшерделәр
Махсус комиссия составына Татарстан авыл хуҗалыгы министрлыгы, авыл хуҗалыгы идарәсе, дәүләт техника күзәтчелеге, Россельхозцентр вәкилләре, район җитәкчелеге вәкилләре керде. Белгечләр 8 хуҗалыкта булдылар.
"Миңнуллин" хуҗалыгы язны чәчү кампаниясенә яхшы әзерләнеп каршы ала. Барлык техника ремонтланган, орлык һәм ягулык запаслары тәэмин ителгән, минераль ашламалар кайтару төгәлләнеп килә. Быелгы сезонда барлыгы 4 мең гектардан артык чәчү планлаштырыла, моның өчен 18 техника җәлеп ителәчәк.
- Быел без кырларга бөртекле һәм азык культуралары, шулай ук техник культура - көнбагыш чәчүне планлаштырабыз. Барлык чәчү эшләрен вакытында, төгәл агротехник сроклар буенча башкарып чыгарга тырышачакбыз. Кар эреп бетү белән минераль ашламалар кертә, ә аннары дымны каплый башлыйбыз, бу эшләрне без шулай ук оптималь срокларда башкарырга тиеш, - дип сөйләде «Миңнуллин» хуҗалыгы җитәкчесе Генадий Миңнуллин.
Хуҗалыкларның чәчүгә әзерлек дәрәҗәсе берничә параметр буенча тикшерелде. Комиссия беренче чиратта машина-трактор паркының торышын бәяләде. Хезмәткәрләр штатының тупланышына, хезмәтне саклауны оештыруга, шулай ук сыйфатлы орлыклар һәм ашламалар белән тәэмин итүгә аерым игътибар бирелде.
Чәчүне оптималь агротехник срокларда уңышлы башкарып чыгу өчен районда барлык шартлар да бар. Техниканың әзерлеге йөз процентка якын. Авыл хуҗалыгы һәм азык-төлек идарәсе башлыгы урынбасары Марат Белалов билгеләп үткәнчә, районда язгы кыр эшләренә 165 трактор, 90 чәчкеч һәм башка өстәмә агрегатлар әзерләнгән. Планлаштырылган чәчү мәйданнары күләме - 49 мең гектарга якын.