Баулы районында «Гореф-гадэт – изге мирас» фольклор фестивале тәмамланды
Баулы муниципаль районында «Традиции живая нить» – «Гореф-гадәт – изге мирас» дип аталган VIII район фольклор коллективларының йомгаклау фестивале узды. Бу мәдәни вакыйга бик күп катнашучыларны һәм тамашачыларны берләштерде, халык мәдәниятенең чын бәйрәменә әверелде. Ике атна дәвамында фестиваль районның төрле мәдәният учреждениеләрендә узды, анда дүрт йөзгә якын кеше катнашты.
Фестивальдә тамашачылар төбәкнең уникаль мәдәни үзенчәлекләре белән таныша алдылар. Вокаль коллективлар борынгы җырларны һәм мөнәҗәтләрне башкардылар, шулай ук гармун, балалайка, кашык кебек халык уен коралларында осталыкларын күрсәттеләр. Кашыкчылар балалар ансамбле чыгышлары фестивальнең гомуми яңгырашына үзенчәлекле колорит кертте, онытылмаслык бәйрәм рухы тудырды.
6 февральдә район мәдәният йортында финал концерты булды, анда күп кенә төбәкара һәм республика фестивальләре лауреатлары чыгыш ясады. Катнашучылар арасында Покров-Урыстамак, Потап Томбарлы, Кырымсарай һәм Кызылъяр авылларының милли-мәдәни үзәкләре бар иде. Район мәдәният йортыннан «Умырзая» һәм «Асылъяр» кебек вокаль коллективлар, шулай ук «Инсаният» ансамбле бәйрәм кунаклары булдылар.
Тамашачыларның игътибарын Кырымсарай авылының милли-мәдәни үзәге тәкъдим иткән "Мич җылыта, мич ашата, мич дәвалый!" рус йоласы фрагменты җәлеп итте. Тамашачылар шулай ук удмурт халкының гореф-гадәтләре белән «Корка сюан» яки «Новоселье» йоласы фрагменты аша таныштылар, аны Покров -Урыстамак авылының милли-мәдәни үзәге тәкъдим итте. Бу чыгыш буыннан-буынга күчә торган гореф-гадәтләргә чумарга мөмкинлек бирде.
Потап Томбарлы авылының милли-мәдәни үзәге дә читтә калмады, ул, «Туй валли хӗр пухни» яки «Одаривание невесты» дигән чуваш йоласы фрагментын күрсәтте. Бу чыгыш мәдәни мирасны саклау һәм тапшыруның мөһимлегенә ачык мисал булды.
Тамашачыларны шулай ук республика һәм бөтенроссия конкурслары лауреаты булган Кызыл Яр мәдәният йортының «Асылташ» хореография коллективы да сөендерде. Аларның чыгышы фестивальнең чын бизәге булды, алар югары дәрәҗәдәге осталык һәм артистлык күрсәтте.
Йомгаклау концертында катнашучыларны һәм тамашачыларны Башкарма комитет җитәкчесенең социаль мәсьәләләр буенча беренче урынбасары Илмира Хөснуллина сәламләде. Үзенең чыгышында ул мондый чараларның халык мәдәниятен саклау һәм популярлаштыру өчен мөһимлеген билгеләп үтте, иҗат һәм сәнгать кешеләрне берләштерә, аларны бер-берсенә якынайта һәм киләчәк буыннар өчен традицияләрне сакларга ярдәм итә, дип ассызыклады.
Шулай итеп, «Гореф-гадәт – изге мирас» фестивале халык мәдәнияте бәйрәменә генә түгел, ә тәҗрибә уртаклашу, аралашу һәм илһам алу мәйданчыгына да әверелде.
Баулы районы мәдәният йорты материаллары буенча