Баулыда Әниләр көненә багышланган концерт узды
Шәһәребездә узган әлеге мөһим чара бик күп шәһәр халкын җыйды. Аналарга карата мәхәббәт һәм хөрмәткә багышланган бу бәйрәм һәркемнең күңеленә үтеп керде, йөрәкләрдә җылы хисләр уятты. Чараның тантаналы өлешендә Баулы районы башлыгы Ильяс Гозәеров чыгыш ясады. Ул үзенең чыгышында аналарның тормышыбыздагы әһәмиятен аерым билгеләп үтте һәм барлык катнашучыларга ныклы сәламәтлек, хатын-кыз бәхете, гаилә иминлеге теләде.
Кичәнең иң якты мизгелләренең берсе – аналарны бүләкләү тантанасы булды. Аларның фидакарь хезмәте югары бәяләнде, мактаулы исемнәр белән бүләкләнде. Бәйрәм концерт программасы да бик бай һәм үзенчәлекле иде.
Вокаль ансамбльләр һәм бию коллективлары тамашачыларга матур чыгышлар бүләк итте. Концертта җирле үзешчән сәнгать осталары гына түгел, шәһәр кунаклары да чыгыш ясады. Әлеге концерт әниләр өчен чын бәйрәм генә түгел, ул барлык катнашучыларны да иң кадерле кешеләренә карата хөрмәт һәм мәхәббәт хисләре белән берләштерде.
Әниләр көне – ул бәйрәм генә түгел, ә безгә һәрчак ярдәм кулы сузучы, илһам бирүче, чиксез мәхәббәт бүләк итүче кадерле әниләребезгә «рәхмәт» әйтү мөмкинлеге дә.