Баулы районының мактаулы гражданины Әнвәрд Галиәкбәров 95 яшен билгеләп үтә
ТР Эчке эшләр министрлыгының хөрмәтле ветеранын котларга дип тантаналы чарага туганнары гына түгел, хакимият һәм полиция вәкилләре дә килде. Баулы районы башлыгы Ильяс Гозәеров юбилярны котлап, аңа “Баулы районына 95 ел” юбилей медале, истәлекле бүләк һәм Россия Президенты Владимир Путиннан изге теләкләр белән хат тапшырды.
Иртәдән Әнвәр Галиәкберовның иркен һәм уңайлы фатирында бәйрәм атмосферасы хөкем сөрде. Аның кызы Фәридә һәм Мәскәүдә яшәүче оныгы тәмле һәм матур бәйрәм өстәле әзерләгәннәр иде. Алар иң кадерле кешеләренең хәлен белергә һәм аның турында кайгыртып торырга һәрвакыт вакыт табалар.
Юбилей тантаналы һәм җылы атмосферада узды. Соңыннан юбиляр үзенең бәйрәм көне шатлыгын уртаклашкан һәркемгә 100 яшькә кадәр яшәүләрен теләде һәм озак яшәү серләре белән уртаклашты.