Баулыда педагогик хезмәт ветераны үзенең 95 яшьлек юбилеен билгеләп үтә
Гомеренең 33 елын ул педагогик эшчәнлеккә багышлый - математика укыта. Пенсиягә чыкканчы Баулының 3-нче санлы мәктәбендә эшли.
Клавдия Григорьевна 1929 елның 7 октябрендә Киров өлкәсенең Рожки авылында туа. Сугыш елларында яшьтәшләре белән колхозда хезмәт итә. Уку алдынгысы була. Мәктәпне тәмамлагач, Казан педагогика институтының физика-математика факультетына укырга керә. 1951 елда бүлү буенча аны Татарстан АССРда эшкә калдыралар. Биредә ул үзенең булачак ире Сәйрин Габбас улын очрата.
1953 елда алар тормыш иптәшенең туган ягына - Баулыга күчеп китәләр. Сәйрин Габбас улы танылган адвокат була. Вахитовлар бергә 36 ел бәхетле гомер кичерәләр, ул һәм кыз үстерәләр. Бүгенге көндә кызлары Эстониядә яши, шигырьләр яза, Эстония шагыйре.
Улы Сургутта яши. Клавдия Григорьевнаның дүрт оныгы һәм биш оныкчыгы бар.
Бүгенге матур юбилей кунаклары әйтүенчә, интеллигент, олы яшьтә булуына карамастан, зифа буйлы Клавдия Григорьевна һәрвакыт матур булып йөрергә ярата. Ул әле дә үкчәле туфли киеп йөри. Аның сүзләренчә, аңа матур киемнәр, туфлиләрне, кытлык заманнар булуына карамастан, һәрвакыт ире сатып алган булган.
Хәзер Клавдия Григорьевна үзенең уңайлы фатирында ялгызы яши, аны социаль хезмәткәр карый.
Юбиляр барлык кунакларга күрсәткән игътибарлары, котлаулары өчен чын күңелдән рәхмәтле иде.