Баулы районы авылында укучылар белән коррупция һәм киберкуркынычсызлык турында сөйләштеләр
Баулы муниципаль районы Башлыгы ярдәмчесе Альбина Нәҗмиева укучыларга коррупция төшенчәсе һәм аңа каршы көрәш методлары турында сөйләде. Чара җанлы диалог белән үрелеп барды, аның барышында укучылар коррупция турында үз фикерләре белән уртаклаштылар. Коррупция турындагы видеороликлар балаларга тагын бер тапкыр коррупциянең начар һәм законга каршы булуына инанырга ярдәм итте, кеше намуслы һәм лаеклы эшләргә, законнарны үтәргә, ә иң мөһиме тынычлыкта һәм татулыкта яшәргә тиеш.
Шулай ук Альбина Нәҗмиева укучыларга Интернет һәм социаль челтәрләрнең яшүсмерләр психикасына йогынтысы турында сөйләде һәм деструктив төркемнәр йогынтысына ничек эләкмәскә кирәклеге турында киңәшләр бирде. Очрашу вакытында җиденче сыйныф укучыларына террорчылык турында «Уяу бул» һәм «Вербовщикны ничек танырга» видеороликлары күрсәтелде.