Россия Почтасы ярдәмендә 640 татарстанлы сөяк мие донорларының Милли регистрына керде
Сөяк мие донорларының Милли регистры Россиянең 86 төбәгендә яшәүчеләрдән гаризалар алды. Шул рәвешле, җибәрүләр географиясе хәзер бөтен илне диярлек колачлый. Иң күп теләк белдерүчеләр Мәскәүдән (3429), Мәскәү өлкәсеннән (2253), Санкт-Петербургтан (2165), Краснодар төбәгеннән (1192), Ростов өлкәсеннән (766), Свердловск өлкәсеннән (737), Новосибирск өлкәсеннән (674), Татарстан Республикасыннан (640), Башкортостан Республикасыннан (625). Аларның 20 кешесе онкология белән авыручы кешеләр өчен сөяк мие доноры була алды.
Россия Почтасы ярдәмендә җәлеп ителгән барлык донор булырга теләк белдерүчеләрнең яртысы диярлек өлкә үзәкләреннән ерак урнашкан зур булмаган торак пунктларда яши.
Хәзер төзелә торган донорлар базасы әле озак еллар эшләячәк. Әгәр кеше регистрга 18 яшендә кергән булса, мәгълүмат анда 36 яшькә кадәр сакланырга мөмкин. Бу вакыт дәвамында донор һәм пациент генотиплары туры килгән очракта, сөяк мие трансплантациясен үткәрергә һәм кешенең гомерен саклап калырга мөмкин булачак.
Мондый туры килүнең мисалы - Саратовтан алты яшьлек малай Дима Палибин тарихы. Диманың иммун системасында генетик дефект. 2022 елда малайга туры килә торган Донор тапканнар һәм сөяк мие трансплантациясен уңышлы уздырганнар. Матбугат конференциясендә Дима әнисе белән беренче тапкыр малайның гомерен саклап калган кеше белән очрашты.
Сөяк миенең потенциаль доноры булу өчен rdkm.ru сайтында гариза калдырырга кирәк. Алга таба донор булырга теләгән кеше, почта аша биообразецлар алу буенча махсус җыелма һәм инструкция, регистрга керү турында килешү, сәламәтлеге торышы турында анкета, шәхси мәгълүматларны эшкәртүгә һәм тапшыруга ризалык, шулай ук кире җибәрү өчен конверт алачак.
Донор булырга теләгән кеше ике яңагының да эчке ягыннан мазокны мөстәкыйль рәвештә, медицина хезмәткәреннән башка ала алачак. Шуннан соң биообразецлар һәм тутырылган документларны почта аша Казанга җибәрергә кирәк, анда регистр лабораториясе белгечләре типлаштыру үткәрәчәк һәм кешенең генотибын билгеләячәк. Мәгълүматлар сөяк мие донорларының Милли регистрының мәгълүмат системасына кертеләчәк. Үрнәкләрне җибәрү бушлай.