Баулыда зона семинары узды
Чарада Татарстан Республикасы авыл хуҗалыгы һәм азык-төлек министры урынбасары Гелюс Баязитов, Баулы районы башлыгы Ильяс Гозәеров, терлекчелек һәм үсемлекчелек буенча сәүдә вәкилләре, хуҗалык җитәкчеләре һәм зоотехниклары, җирлек башлыклары, КФХ, шәхси ярдәмче хуҗалык җитәкчеләре һәм милекчеләре, ветеринарлар һәм башкалар катнашты.
Зона семинарын Муса Җәлил исемендәге мәдәният йортында үткәрделәр, чараның рәсми өлеше алдыннан семинарда катнашучылар терлекчелек һәм кошчылык өчен җиһазлар, азык һәм ветеринария продукциясе күргәзмәсе белән таныша алдылар. Үз товарларын 20дән артык сәүдә вәкиле күрсәтә алды. Чарада катнашучылар Россиянең төрле почмакларыннан килгәннәр. Үз продукцияләрен белорус вәкилләре дә тәкъдим итте, алар күргәзмәгә яшь терлекләр өчен тәгаенләнгән җиһазлар алып килгәннәр.
- Безнең завод совет чорыннан ук 500дән артык төр продукция чыгара, – ди сәүдә вәкиле Нелли Зараковская. – Без продукцияне төрле ысуллар белән ясыйбыз, алар терлекчелек өчен генә түгел, халыкка куллану өчен дә бар, мәсәлән, чиләкләр, савытлар һ.б.
Үз чиратында, республика башкаласыннан башка җиһазлар китерелде. Әйтик, Казан вәкилләре бозауларны эчертү өчен сөт таксиы, җиһазлар, угыз эретү җайланмасын күргәзмәгә куйганнар.
Безнең бар җитештерү терлекче хезмәтен җиңеләйтүгә юнәлдерелгән, - дип сөйләде «Хезмәткә дан» корреспондентына сату бүлеге җитәкчесе Леонид Гоголь. - Мәсәлән, пастеризаторның сөт таксиын куллану бозауларны эчертү процессына зур өстенлекләр бирә. Сер түгел, ашату – терлекчелектә иң мөһим процесс. Аның дөрес оештырылуына сыерларның иминлеге һәм аларның продукт бирүчәнлеге бәйле. Ләкин олы терлекнең сәламәтлеге кечкенәдән үк урнаша, шуңа күрә яшь терлекне ашату бик зур игътибар таләп итә.
Алга таба семинарда катнашучыларның барысы да чараның рәсми өлешендә булды. Татарстан Республикасы авыл хуҗалыгы һәм азык-төлек министры урынбасары сүзләренчә, Татарстан Республикасында терлекчелек авыл хуҗалыгының өстенлекле тармагы булган һәм булып кала да. Ә бу тармакның үсеш дәрәҗәсе буенча республика Идел буе төбәгендә дә, гомумән Россия буенча да алдынгы урынны алып тора.
Әйтик, өч айда Татарстан Республикасында 433 мең тонна сөт җитештерелгән, бу узган ел белән чагыштырганда 8% ка арткан. Сөт җитештерү күләме буенча төбәкләр рейтингында республика беренче урында тора.