Баулыда Җиңү Парады узды
Кичә Баулының төп мәйданында Бөек Ватан сугышында Җиңүнең 77 еллыгына багышланган тантаналы парад узды. Анда сугыш хәрәкәтләре ветераннары, район җитәкчелеге, эчке эшләр министрлыгының җирле бүлекчәләре һәм МЧС хезмәткәрләре, медицина хезмәткәрләре, студентлар һәм мәктәп укучылары катнашты.
Гадәттәгечә, парад барышында Октябрь мәйданы буйлап яңартылган хәрби техника да үтте.
Чара Мәңгелек ут янында бәйрәм митингы белән дәвам итте. Татарстан Дәүләт Советы депутаты Леонид Якунин Баулы ветераннарын Җиңү көне белән котлады һәм Татарстан Республикасы Президенты исеменнән котлау сүзләрен җиткерде. Шулай ук барлык ветераннарны һәм чарада катнашучыларны Баулы муниципаль районы хакимияте башлыгы Ильяс Гузаиров котлады. Митингтан соң баулылар Мәңгелек утка веноклар һәм чәчәкләр салдылар.
Театральләштерелгән хореографик композициядән соң мәйданда традицион «Үлемсез полк»йөреше башланды. Район башкарма комитеты вәкилләре, хезмәт коллективлары, иҗтимагый оешмалар, пенсионерлар һәм мәктәп укучылары Мәңгелек уттан Җиңү паркы буйлап Бөек Ватан сугышы ветераннарының фотосурәтләре, транспарантлар белән уздылар.
Бәйрәм тантаналары кичкә кадәр барды.