Баулылы Надежда Звягинцевага 90 яшь тулды

2020 елның 30 ноябре, дүшәмбе

Кичә Поповка авылында яшәүче Надежда Звягинцева үзенең 90 яшьлек юбилеен билгеләп үтте.

Надежда Фёдоровна Фоминовка авылында туган, күп балалы гаиләдә үскән. 

Мәктәпне бетергәч, Надежда Фёдоровна башта урманчылыкта эшләгән, аннары - Поповка табиб амбулаториясендә, соңрак пекарняда, ә лаеклы ялга китәр алдыннан - "Кандыз" совхозында.

Бүгенге көндә ул Поповка авылында яши, өлкән яшьтә булуына карамастан, хуҗалыкта барысын да үзе эшләргә тырыша, бакча карый. 

Юбиляр тормыш иптәше - сугыш ветераны белән дүрт бала тәрбияләп үстергән.

Ветеранны гомер бәйрәме белән район башлыгы урынбасары Ринат Хәмидуллин котлады, җылы теләкләрен җиткерде.