Баулы районы Исергәп авылына бишлене плюс тамгасы белән куярга була

Шундый сүзләр белән башлады Исергәп авыл җирлегендәге җыелышны район башлыгы урынбасары Ринат Хәмидуллин.

Җыен алдыннан ул “Бәкер” крестьян-фермерлык хуҗалыгында, “Зарипова” ипи һәм кондитер эшләнмәләре пешерү цехында, “Ибраһимов” крестьян-фермерлык хуҗалыгында, “Бакыр тау” кафесында, “Карлыгачкай” балалар бакчасында, мәчеттә булды, җитәкчеләр һәм эшчеләр белән аралашты.

– Бүгенге көндә сыерларны ике савымчы сава, 1600-1700 килограмм сөт савып алабыз, – дип сөйләде “Бәкер” крестьян-фермерлык хуҗалыгының йөз сыерлык фермасында мал табибы булып эшләүче Гадилә Моратова. – Маллар сау-сәламәт, кышлатыр азык җитәрлек күләмдә. Вакытында кирәкле ветеринар процедуралар үткәрәбез.

– Безнең эшне башлаганга әле өч кенә ел, – дип каршы алды кунакларны “Ибраһимов” шәхси ярдәмче хуҗалыгы җитәкчесе Рәфис Ибраһимов. – Тәвәккәлләп, “Начинающий фермер” программасы ярдәмендә эшебезне 25 савым сыеры белән башлап җибәрдек. Бүгенге көнгә мал саны икеләтә артты. Бер сыердан көненә 16-17 литр сөт савып алабыз. Үзебезнең 136 гектар җиребез бар. Печән, фураж үзебезнеке хәзер. Җирләрне ике трактор ярдәмендә эшкәртәбез.

– Без җитештергән продукцияне үзәк базарда да көтеп алалар хәзер, – ди “Зарипова” кондитер цехы җитәкчесе Гүзәлия Зарипова. – Алга таба эшебезне киңәйтү, чүпрәдә пешкән авыл икмәген җитештерү теләгем бар.

Авыл мәчетендә Ринат Хәмидуллин мәчеткә җомга намазына килгән авыл картлары белән очрашты.

– Исергәп авылында мәчет белән беррәттән авыл музее да төзеп булмас микән, – дигән сорауны бертавыштан бирде алар. Үзләренең кулларыннан килгәннең барысын да эшләячәкләрен, авылдашларының ярдәм итәчәкләрен дә ассызыклап үттеләр.

– Безнең авыл Оренбург өлкәсе белән чиктәш, мәчеткә кергән кешеләр дә еш кына авыл тарихы белән кызыксыналар, – ди авыл имамы Наил Дәүләтов. – Изге ниятләребез тормышка ашса, үсеп килүче буынга яхшы мирас калдырыр идек.

–​  Әлеге катлаулы сорауны бергәләп хәл итәрбез, – дип ышандырды Ринат Хәмидуллин.

Исергәп авыл җирлегендә үткән отчёт җыелышы, авыл активистларын бүләкләү, чыгышлар хакында тулырак “Хезмәткә дан” газетасы битләрендә укырга мөмкин.