Баулы муниципаль районы

Баулы районының балалары яшь геологлар олимпиадасында катнаштылар

2015 елның 13 июле, дүшәмбе

Бүген Казанда “Заречье” сәламәтләндерү лагеренда Татарстанның яшь геологлары арасында II республикакүләм ачык кыр олимпиадасын ябу тантанасы уздырылды. Чара ТР Премьер-министры урынбасары – мәгариф һәм фән министры Энгель Фәттахов катнашында үтте.

27 июньнән 13 июльгә кадәр Казанда уздырылган олимпиадада Татарстан Республикасыннан 30 команда, Кырым Республикасының Бакчасарай районы һәм Казакъстан Республикасы командалары катнашты. Татарстан данын Тәтеш, Азнакай, Актаныш, Әлмәт, Кукмара, Баулы, Балтач, Теләче, Биектау, Алабуга, Яшел Үзән, Лениногорск, Түбән Кама, Нурлат, Саба, Сарман муниципаль районнары, шулай ук Казан һәм Яр Чаллы шәһәрләре командалары яклады.

Баулы районын 7нче һәм 2нче мәктәп укучылыры (барлыгы 8 кеше) тәкъдим итте. Аларның җитәкчеләре – 7нче мәктәпнең география укытучысы Коберник Марина Юрьевна булды.

Олимпиадада катнашучылар минералогия, палеонтология, радиометрияне белүгә ярышларда һәм конкурсларда көч сынашты. Шулай ук яшь геологлар өчен мәдәни чаралар оештырылды.

Бәйге нәтиҗәләре буенча, абсолют җиңүче исемен Казанның Совет районы 93нче гимназиясе укучысы Марина Лаврухина яулады. Шул ук мәктәп укучысы Константин Никашин II урынга лаек булды. Түбән Каманың 22нче мәктәбендә белем алучы Антон Толстиков – өченче.

Командалар исәбендә җиңү бәхете Әлмәт районының “Девон” командасына тәтеде. Казанның Совет районы “Селенит” командасы – II урында. Түбән Каманың “Азурит” командасы исә III урынга лаек булды.
Олимпиада нәтиҗәләре буенча 30 июльдән 10 августка кадәр Төмән шәһәрендә яшь геологларның X Бөтенроссия ачык кыр олимпиадасында катнашачак Татарстан җыелма командасы формалаша.

Оценить материал и/или оставить мнение

БАРЛЫК ЯҢАЛЫКЛАРНЫ УКУ