Язучы Зифа Кадырова белән очрашу

Чылтырап аккан тау чишмәләренә, куе урманнарга бай, гүзәл табигатьле Башкортстан Республикасында туып үскән татар кызы Зифа Кадырова үзенең “Сагынырсың — мин булмам” (“Сумбуль” рус телендә), “Язмыш сынавы”, “Көтеп узган гомер”, “Бәхеткә юл кайдан?” китаплары аша укучылар мәхәббәтен яулап, татар әдәбиятына язгы ташкын кебек килеп керде. Һәркемгә таныш хис-тойгыларны үзәкләрне өзәрлек итеп тасвирлап, бик күпләрне үзенә әсир итте ул.
Әсәрләрендә тормышның кайсы гына өлкәсенә кагылмый Зифа ханым: яшьләр, гаилә, ата-ана һәм балалар мөнәсәбәтләре, ялгызлык ачысы... Китап укучыларның кайберләре геройлар язмышын үзенеке белән тәңгәл китереп күз яше түксә, икенчеләр әсәрләр аша гыйбрәт һәм сабак алгандыр.
Зифа Кадырова китаплапры аша китапханә юлын күптән оныткан бик күпләр яңадан китапханә ишеген ачып керделәр һәм китап укучылар санын бермә-бер арттырдылар.
Һәм менә ниһаят Баулы үзәк китапханәсенең милли әдәбият һәм сәнгать бүлегендә язучы Зифа Кадыйрова белән китап сөючеләребезнең күптән көткән очрашу кичәсе узды.
19 мартта Баулы районы үзәк китапханә хезмәткәрләренең чакыруы буенча, ерак араларны якын итеп, Зифа ханым үзенең укучылары, китап, әдәбият сөючеләр белән очрашуга килде.
Кичәне Баулы үзәкләштерелгән китапханәләр системасы директоры Л.Р.Фәхриева ачып җибәрде һәм авторга чәчәкләр бүләк итте.
Зифа ханым үзенең тормыш юлы, иҗаты турында сөйләде, тамашачыларның бик күп сорауларына җавап бирде. Очрашуны милли әдәбият һәм сәнгать бүлеге хезмәткәре Шәрипҗанова Р.Д. алып барды. Кичә барышында залда утыручылар арасыннан рәхмәт сүзләре белән чыгыш ясадылар, чәчәкләр бүләк иттеләр. Бик күпләр язучының автограф белән китапларын сатып алдылар.