Баулы хоккейчылары Татарстан беренчелеге чемпионнары булдылар

Баулы бозында узган финал уеннарында Баулы шәһәреннән «Девон», Габдрахман авылыннан «Батыр», Алабугадан «Серебряные Волки», Буадан «Арктика», Казаннан «Ак Бүре» һәм Биектаудан "Биектау"командалары катнашты.

- 2024-2025 еллар сезонында хоккей командалары ике зонага – Казан зонасына һәм көньяк-көнчыгыш зонага бүленде. Уеннар алты ай дәвам итте, һәр төркемнән беренче өч урынны алган командалар финалга чыкты һәм плей-офф системасы буенча республика чемпионын уйнатты, - дип сөйләде «Девон» боз сарае директоры Равил Мөхәммәтҗанов. 

Бозда беренче урын өчен «Девон» һәм «Арктика» командалары көрәште - алар арасында мавыктыргыч көрәш барды. Период 4:4 исәбе белән тәмамланды, нәтиҗәдә җиңүчене буллитлар буенча билгеләделәр.

Уеннарны Баулы районы башлыгы Ильяс Гозәеров та күзәтеп торды, командаларны бүләкләгәндә ул уеннарны артык дулкынландыргыч булганын билгеләп үтте, җанатарларның актив көч биреп торуларын да ассызыклады.

- Мондый хоккей бәйрәме өчен уенчыларга зур рәхмәт. Әлегә кадәр йөрәк урынында түгел, ярсып тибә, шундый кызыктыргыч матчлар өчен без хоккейны яратабыз да инде. «Девон» командасы егетләре, сезне җиңүегез белән котлыйм, барлык командаларга алга таба уңышлар телим! - дип билгеләде ул.

Призерлар урыннары түбәндәгечә бүленде: өченче урынны «Серебряные Волки» командасы, икенче урынны «Арктика» командасы алды. Чын киеренке көрәштән соң турнир чемпионнары булып «Девон» командасы танылды. Команданың тренеры Владимир Орлов.
Призлы урыннарны алган командалар медальләр, кубоклар, ә чемпион команда бүләкләр белән дә бүләкләнде.