Татарстан Росреестры 2025 елда 10 мең реестр хатасын төзәтәчәк
«Пространство мәгълүматларының милли системасы» дәүләт программасы кысаларында 2022 елдан башлап Татарстанда объектлар чикләре турындагы мәгълүматларда тарихи рәвештә тупланган 64 меңнән артык реестр хатасы төзәтелгән, шуларның 50 меңгә якыны – җир кишәрлекләренә, 15 меңгә якыны – капиталь төзелеш объектларына карата.
"Татарстанда реестр хаталарын ачыклау һәм төзәтү буенча системалы эш актив дәвам итә. Соңгы өч елда без 65 мең реестр хатасын төзәтә алдык. Бу ЕГРНда булган мәгълүматларның дөреслеген арттыру һәм, димәк, Росреестр компетенциясенә караган дәүләт хезмәтләре күрсәтүнең сыйфатын яхшырту өчен кирәк. Әгәр элек реестр хаталарын төзәтү өчен гражданнарга кадастр эшләрен үз хисабына башкарырга, ә төзәтү мөмкин булмаган очракта хокукларны суд тәртибендә якларга туры килсә, хәзерге вакытта әлеге эш милекчеләрнең өстәмә финанс чыгымнарыннан башка башкарыла», - дип билгеләп үтте Татарстан Росреестры җитәкчесе урынбасары Нияз Галиәкбәров.
Шулай ук ведомствода реестр хатасы хокук иясенең үз гаризасы буенча да төзәтелергә мөмкин, дип искәрттеләр. Моның өчен Татарстан Росреестрына ЕГРНда реестр хатасы булу турында күчемсез милек объектының кадастр номерын күрсәтеп мөрәҗәгать җибәрергә кирәк. Хезмәт бушлай күрсәтеләчәк.
"2024 елдан реестр хатасын бетерү срогы өч ай урынына 1 ай тәшкил итә. Өстәвенә, күчемсез милек объекты чикләренең урнашу урыны турындагы ЕГРН мәгълүматларын үзгәртүгә хокук иясеннән ризалык килгәндә, күрсәтелгән срок тәмамланганчы, ягъни бер айга кадәр тиешле үзгәрешләр кертергә мөмкин булачак", - дип хәбәр итте Роскадастрның Татарстан Республикасы буенча филиалы директоры урынбасары Артур Егоров.
Игътибар өчен
Закон нигезендә, хокукларны теркәү органына тапшырылган документлардан ЕГРНга күчерелгән хата реестр хатасы булып тора. Бу межалау яисә техник план, территориянең карта-планы, тикшерү акты, шулай ук төрле зоналар һәм территорияләр чикләре турында белешмәләр булган документлар булырга мөмкин. Мондый хаталар кадастр инженеры җибәргән хаталар яки мәгълүмати хезмәттәшлек тәртибендә Росреестрга җибәрелгән документларда хаталар булу аркасында килеп чыга. Реестр хатасын исәпкә алу-теркәү гамәлләрен башкарганда яисә ЕГРНга чикләр реестры объектларының урнашу урыны турында белешмәләр керткәндә ачыкларга мөмкин.