Баулы мөселманнары Ураза бәйрәмен билгеләп үтә
Мөселманнар Исламда ике төп бәйрәмнең берсен – Ураза бәйрәмен яки Ид Әл-фитр бәйрәмен билгеләп үтә башладылар. Ул изге Рамазан аеның тәмамлануын билгели һәм өч көн дәвам итәчәк. Баулының барлык мәчетләрендә иртән бәйрәм намазлары үтте, анда дистәләгән кеше җыелды.
Үзәк "Гали" мәчетендә гаетне иртәнге алтылар тирәсендә бәйрәм итә башладылар. Мөселманнар изге Рамазан аен бәйрәм намазы белән озаталар һәм Ураза бәйрәмен каршылыйлар. Ураза тотучылар утыз көн буе катгый кагыйдәләрне үтәделәр, тәүлекнең якты вакытында ашау-эчүдән баш тарттылар.
Күп кенә мөселманнар Ураза бәйрәме төнен намазлар укып үткәрә. Бәйрәм вәгазен район имам-мөхтәсибе Әнвәр хәзрәт Хәмитов укыды. Ул Рамазан аеның мөһимлеген билгеләп үтте, Ураза ае иманны ныгытырга, мохтаҗларга карата юмартлык күрсәтергә ярдәм итә.
Мөселманнарга җылы котлау сүзләре белән Баулы муниципаль районы башлыгы урынбасары Ринат Хәмидуллин мөрәҗәгать итте.
- Үз исемемнән, район башлыгы Ильяс Гозәеров исеменнән сезне Ураза бәйрәме белән котлыйм! Ходай сезгә һәм гаиләләрегезгә бәрәкәт бирсен. Бүген көндә безнең районда 16 мәчет бар, Рамазан ае дәвамында аларда ифтарлар үткәрелде, таравих намазлары укылды, бу бик тә сөенечле, -дип билгеләп үтте ул. - Махсус хәрби операциянең тизрәк тәмамлануын һәм бүген үзләренең патриотик бурычларын зур җаваплылык белән үтәүче егетләребезнең гаиләләренә исән-сау әйләнеп кайтуларын телибез.
Тантананың төп элементы - уртак дога. Мөселманнар намазны тигез сафларга басып укыдылар. Бәйрәм намазы - ул күмәк дога, дин тотучыларның бердәмлеген чагылдыра, Рамазан ае белән хушлашуны символлаштыра.
Бәйрәм уңаеннан мәчет ишегалдында өстәлләр җәелдерелде, мәхәллә кешеләре тәмле пылаудан авыз итә алдылар. Сый 400 кешегә исәпләнгән иде.
Мөселманнар Ураза бәйрәмен гаиләдә дәвам итәчәк. Бу көнне шулай ук сәдака бирү, күршеләрне сыйлау, туганнарыңа кунакка бару гадәте бар.