Баулыда Ватанны саклаучылар хөрмәтенә зур концерт оештырылды
Тантана солдатларның батырлыгы темасына җырлар һәм шигырьләр белән башланып китте. Патриотик чарага төрле буын вәкилләре: Бөек Ватан сугышында катнашучылар, тыл ветераннары, сугышчы-интернационалистлар, махсус операциядә катнашучылар, хәрбиләрнең гаиләләре, яшь армиячеләр, иҗтимагый оешмалар вәкилләре җыелды.
Тамаша залының көчле яртысын якынлашып килүче бәйрәм белән Баулы районы башлыгы Ильяс Гозәеров котлады.
Бөек Ватан сугышында катнашкан Халик Кәримов, Иван Поликушин, Аркадий Брехов һәм Нургали Мәҗитовка Баулының Мактаулы гражданнары исеме бирелде. Бу кешеләр – тере тарих. Алар бик авыр сынаулар аша, гаять зур тырышлык белән, җиңү яулаган кешеләр. Концертта катнашкан фронтовиклар - 99 яшьлек Халик Габделкәрим улына һәм 100 яшьлек Нургали Нуриман улына медальләр һәм Мактаулы гражданнар дипломнары район башлыгы тарафыннан тапшырылды. Сигез тыл хезмәтчәне Бөек Җиңүнең 80 еллыгына медальләре белән бүләкләнде.
Алга таба сәхнәдә махсус операциядә катнашучыларны хөрмәтләделәр – МХО зонасында батырлык күрсәткән Алмаз Ганиевка «Батырлык өчен» медале, Дмитрий Быстровка 2 дәрәҗә «Батырлык өчен» медале тапшырылды.
Концертта шулай ук МХО сугышчыларына гуманитар ярдәм җыюда актив катнашкан халыкны бүләкләү тантанасы да булды.
Бәйрәм программасында шәһәребез һәм районыбызның иҗат коллективларының якты, күңелгә үтеп керерлек номерлары урын алды. Концерт тарихның төрле чорларында Ватан өчен көрәшкән батырларның батырлыгына хөрмәт күрсәтү, баулыларның берләшү һәм бердәмләшү мизгеленә әверелде.