Татарстанда МХОдә һәлак булганнарның гаиләләре азык-төлек һәм көнкүреш химиясе җыелмаларын алачак
Шулай ук ярдәм I һәм II төркем инвалид булган сугышчыларның гаиләләренә җибәреләчәк.
Татарстанда «Нәфис» фондының МХОдә катнашучыларның гаиләләренә ярдәм итүгә юнәлдерелгән хәйрия акциясенең 3 нче этабы башланды. Республиканың барлык шәһәр һәм районнарына гуманитар ярдәм җибәрү башланды, аның составына азык-төлек продуктлары һәм көнкүреш химиясе керә. Мондый бүләкләрне махсус операциядә һәлак булганнар гаиләсенең һәр әгъзасы, шулай ук хәрби хәрәкәтләр нәтиҗәсендә I һәм II төркем инвалид булган сугышчыларның гаиләләре алачак.
Республика буенча барлыгы 383,5 тонна продукция җибәреләчәк. Һәр җыелманың күләме уртача ярты елга исәпләнгән. Җыелмалар гаилә әгъзалары санына карап тапшырыла. Масштаблы хәйрия акциясе «Нәфис» фонды тарафыннан инде өченче тапкыр гамәлгә ашырыла.
"МХОдә катнашучыларының гаиләләренә ярдәм итүнең яңа этабын без Ватанны саклаучылар көне – сугышчыларыбызның батырлыгын һәм фидакарьлеген символлаштырган бәйрәм алдыннан җибәрәбез. Аларның һәркайсы тирән ихтирамга һәм рәхмәткә лаек. «Нәфис» фонды өчен махсус операциядә катнашучыларның гаиләләренә ярдәм итү өстенлекле булып кала, һәм бу юнәлештәге эшне без һичшиксез дәвам итәчәкбез», – ди РФ Дәүләт Думасы депутаты, «Нәфис» ХФ оештыручысы Ирек Богуславский.
Исегезгә төшерәбез, «Нәфис» фонды ярты ел саен Татарстаннан МХОдә һәлак булганнарның гаиләләренә зур гуманитар җыелмалар җибәрә. Беренче тапкыр акция 2024 елның гыйнвар-февралендә узды, икенче тапкыр – июль ахырыннан сентябрь ахырына кадәр. Узган елның уртасыннан башлап ярдәм, шулай ук, I һәм II төркем инвалид булган махсус операциядә катнашучыларның гаиләләренә тапшырыла. 2024 ел дәвамында «Нәфис» тарафыннан җибәрелгән гуманитар ярдәмнең гомуми күләме 650 тонна тирәсе тәшкил итте.
«Нәфис» фонды Татарстанның барлык муниципалитетлары администрацияләре белән тыгыз элемтәдә эшли, алардан тиешле мәгълүмат ала. Әйтик, гуманитар акциянең һәр этабы алдыннан администрация ярдәм алу исемлеген актуальләштерә һәм гаиләләргә наборларны тапшыруда ярдәм күрсәтә.
Гаиләнең һәр әгъзасына "Нәфис" фонды озак саклана торган туклану продуктлары – тушенка, төрле ярмалар, макарон, шикәр, он, үсемлек мае, майонез, кетчуп һәм джем җибәрә. Көнкүреш химиясе исемлегенә савыт-саба юу чаралары, кер юу һәм чистарту порошоклары, шампуньнар, каты һәм сыек сабын керә.
Белешмә:
«Нэфис» хәйрия фонды Дәүләт Думасы депутаты Ирек Богуславский инициативасы белән 2023 елның көзендә булдырылган. Ул фонд советын җитәкли, аңа шулай ук Россиянең атказанган тренеры Владимир Алекно да керә. Фондның Попечительләр советы составында «Нәфис Косметикс» АҖ генераль директоры Дина Лаврикова һәм «Казан май комбинаты» АҖ Директорлар советы рәисе Дмитрий Самаренкин бар.
«Нәфис» фондының хәйрия акцияләрендә аның вәкилләре белән bfnefis@yandex.ru электрон почтасы аша элемтәгә кереп катнашырга мөмкин.