Баулыда Совет гаскәрләрен Әфганстаннан чыгару көненә багышланган митинг уздырдылар
15 февральдә соңгы совет солдатының Әфганстан территориясеннән чыгуына 36 ел тулды. Ун ел дәвамында алар Әфганстанда тынычлык урнаштыру буенча хәрби бурычларын үтәгәннәр. Безнең хәрбиләр, ул вакытта яшь егетләр, үзләренең гражданлык бурычларын намус белән үтәп, антларына ахырга кадәр тугъры калганнар.
Әфганстандагы сугыш - тарихыбызда батырлык белән тулы катлаулы чор. Анда Баулы районыннан 120 кеше катнашкан, аларның берсе сугыш кырыннан кайта алмаган. Күрсәткән батырлыклары өчен 13 якташыбыз сугышчан орден-медальләр белән бүләкләнгән.
Митингны Баулы районы башлыгы Ильяс Гозәеров ачып җибәрде, ул үзенең чыгышында якташларыбыз – интернационалист сугышчылар белән хаклы рәвештә горурлануыбызны билгеләп үтте. Алар киләчәк буыннар өчен үрнәк кешеләр, ә бүгенге көндә яшьләрне патриотик тәрбияләүдә актив катнашалар.
Баулы шәһәре, Баулы һәм Ютазы районнары хәрби комиссары Илшат Хәлитов, район сугышчан хәрәкәтләр ветераннары советы рәисе Флүр Сәлахов батырлыклары өчен баулыларга рәхмәт сүзләре белән мөрәҗәгать иттеләр.
Митингта катнашучылар һәлак булган сугышчыларны бер минут тынлык белән искә алдылар. Истәлекле чара традицион рәвештә монументка венок һәм чәчәкләр салу белән тәмамланды.