Баулыда тимер туйны билгеләп үттеләр
Баулы районының Александровка авылында Әхмәдиевләр гаиләсенең туй юбилее тантанасы узды.
Моннан 65 ел элек язмыш Рәис Гани улына һәм Зәния Минһаҗ кызына олы бүләк ясаган – алар бер-берсен очраткан, кавышкан. Аларның озак вакытлар сыналган гаилә мөнәсәбәтләре тугрылык үрнәге булып тора. Юбилярлар матур балалар тәрбияләп үстергәннәр, аларның 7 оныклары, 10 оныкчыклары бар.
Әхмәдиевләр лаеклы хезмәт юлын үткән - Рәис Гани улы тракторист булып эшләгән. Ул - тыл хезмәтчәне, Бөек Ватан сугышы елларында фидакарь хезмәте өчен орденнар һәм медальләр белән бүләкләнгән. Зәния Минһаҗ кызы да туган авылы колхозында намуслы көч куйган.
Юбилярларга Баулы муниципаль районы башлыгы И.И. Гозәеров исеменнән Рәхмәт хаты тапшырдылар. Бу тантаналы көнне Әхмәдиевләрне балалары, онык һәм оныкчыклары котлады.