Баулы районында урак башланды
Кичә Баулы районы хуҗалыклары урып-җыюга керештеләр. Басуларга беренчеләрдән булып «Бәкер» һәм «Николашкино»крестьян-фермер хуҗалыклары хезмәткәрләре чыкты.
Узган елларда урып-җыю июльнең соңгы көннәрендә башланса, быел уҗым культураларын бер атнага иртәрәк чаптыруга керешкәннәр. Авыл хуҗалыгы һәм азык-төлек идарәсенең җитештерү-маркетинг бүлеге начальнигы Наил Галиуллин сүзләренә караганда, моңа һава торышы уңай торуы йогынты ясаган.
«Бәкер» хуҗалыгы кырларында бүгенге көндә ике техника эшли. Алар бөртекле культураларны чабалар.
Авыл хуҗалыгы һәм азык-төлек идарәсе мәгълүматларына караганда, районда көзге культуралар мәйданы 8 мең гектар тәшкил итә.
Наил Галиуллин билгеләп үткәнчә, быел барлык кыр эшләре вакытында башкарылган, шуңа күрә уңышка фараз яхшы.