Баулылар Халыкара авыл яшьләре конгрессында катнашты
6-9 февральдә Казанда халыкара авыл яшьләре конгрессы узды, анда 25 илдән һәм Россиянең 50 төбәгеннән вәкилләр килгән иде.
Баулы делегациясе буларак «Яшьләр дөньясы» яшьләр үзәге каршындагы «Татарстан Республикасы Аграр яшьләр берләшмәсе» нең Баулы бүлекчәсе рәисе Елена Дәүләтова, хәрәкәт активистлары – Васькино-Туйралы авыл мәдәният йортының сәнгать җитәкчесе Владимир Будин һәм эшмәкәр, фермер Артак Микаелян катнашты.
Татарстан башкаласына БДБ, Германия, Мисыр, Конго, Һиндстан, Испания, Литва, Марокко, Мексика, Нигерия, Пакистан, Польша, Португалия, Төньяк Македония, Төньяк Ирландия, Сербия, Сенегал, Словения, Төркия һәм Эстония илләреннән авыл яшьләре лидерлары килде.
Конгресс эше «Авылда яшьләр эшкуарлыгы: трендлар, алымнар һәм уңышка ирешү серләре», «Мәдәният, мили үзаңны саклау һәм туризм: мәдәни үсеш драйверлары буларак авыл территорияләре» һәм «Мәгариф һәм лидерлык: уңышка ирешкән шәхесне үстерү өчен авыл җирлегенең уникаль мөмкинлекләре» юнәлешләре буенча оештырылды. Конгресс эшенең һәр юнәлешендә республика, федераль һәм дөнья дәрәҗәсендәге экспертлар тәкъдим ителде.
Шулай ук конгресста катнашучылар Мамадыш шәһәрендә «SUNNYФЕСТ» креатив чаналар фестивалендә булдылар. Фестивальдә республикабызның 25 районыннан һәм Россиянең ике төбәгеннән килгән авыл яшьләре катнашты. Конкурс кагыйдәләре буенча командаларга гадәти булмаган чаналар ясарга, оригиналь костюмнар һәм төшү алдыннан кечкенә генә перформанс уйлап табарга кирәк иде.
Конгресс кысаларында Эстония, Македония, Һиндстан һәм Пакистан белән 5 килешү имзаланды. Алар Халыкара кооперация турындагы шартнамәләр, шулай ук мәгарифтә тәҗрибә уртаклашуга, авыл мәктәп укучылары белән алмашуга һәм муниципалитетларда яшьләр үзәкләрендә үзидарәне үстерүгә юнәлдерелгән.
Фото: соц.Instagram челтәре mol molodezjka_bavly